Xukuumadda oo ka dagaalamaysa inay Mucaaridka iyo Madasha wada-tashigu helaan Munaasibad madaxbanaan oo loogu hadlo dulmaneyaasha SNM..Warbixin
[caption id="attachment_99912" align="alignleft" width="300"]
Sahra Halgan oo gaashaanka ku dhufatay Amarka xukuumaddu ku joojisay Xuska Muj. SNM[/caption]Hargeysa(GNA)-Amar ka soo baxay Wasaaradda Arrimaha Gudaha Somaliland ayaa lagu joojisay Xaflad lagu xusayo Maalinta Shuhadadda SNM oo ku beegan Khamiista Berri ee 17 Bisha October.
17 October oo ah Maalin loo gaar yeelay in xusuus gaar ah loo sameeyo Mujaahidiintii Ururka SNM kaga dhintay Dagaalkii waddanka lagaga xoreeyay Taliskii Milateriga ahaa ee Soomaaliya, ayaa sanad kasta waxa loo sameeyaa Munaasibado baroor diiq ah, kuwaasoo ay soo qaban qaabiyaan Jimciyada Muj. Sooyaal iyo dadkii halganka ka soo qayb qaatay, iyadoo ay xafladahaas inta badan dawladda iyo Mucaaridkuba ay ka soo qayb galaan.
Hase ahaatee xuska sanadkan loo sameynayo Shuhadadda SNM ee ay Jimciyadda Sooyaal diyaarisay waxa la mataano noqotay Munaasibad kale oo iskeed u qaban qaabisay Fannaanada Caanka ah ee Sahra Axmed Jaamac (Sahra Halgan) oo ka mid ah Hablihii halganka ka soo qayb qaatay , si weyna loogu xusuusto doorkii ay ku lahayd gulufkii waddanka lagu xoreeyay.
Sahra Halgn ayaa xusuusta 17 October ee beri waxay u diyaarisay Xaflad qaban qaabaddeedu bishanba socotay oo lagu qabanayo Xarunta Hido-dhowr oo ah Hudheel iyo goob hidaha iyo Dhaqanka lagu uruuriyo ay dhawaan ka furtay Magaalada Hargeysa ee Caasimada Somaliland.
Xukuumadda oo Amar dul-dhigtay.
Hadaba Munaasibada ay qabanqaabisay Fannaanadani, ayaa waxa isku hortaagay Wasaarada arrimaha gudaha oo amar ku bixisay inaan Xafladaas lagu qaban Karin Hudheelka Sahra Halgan, isla markaana munaasibada 17 October oo ah tan ay soo abaabuleen Jimciyada Sooyaal oo Xukuumadduna qayb ka tahay, lagu qaban doono Hudheelka Maansoor oo kaliya.Sidaasina waxa goor dhowd Shir-jaraa’id ku sheegtay Sahra Axmed Jaamac (Sahra Halgan), waxaanay xaqiijisay in caawa loo keenay Warqad ka soo baxday Xafiiska Wasiir ku-xigeenka Amniga ee Wasaarada Arrimaha Cali Axmed Cali.
“waxa caawa salaadii Maqrib markii laga soo baxay lay keenay Warqad ka soo baxday Xafiiska Wasiir ku-xigeenka amniga ee Wasaarada Arrimaha gudaha, warqadaasoo lagu amray inaan Xaflada Shuhadadda SNM lagu xusayo aan lagu qaban Karin halkan (Hudheelka Hiddo-dhowr). Xaflada Shuhadaddana lagu qabanayo Hudheelka Maansoor. “Maanshaallah anba waan ka qayb-gelayaaye!”. taasoo ay Jimciyada Sooyaal qabanayso?. “ markaa waxaan leeyahay waayo cidda amarkaa bixinaysaa, yaan ahay anigu, xaguu joogay Ninka Wasiirka Sheeganaya ee maalintii Ragga Maanta la xusayo dhimanayeen ay annagoo Dhayeyna naftu ka baxaysay ee rasaasta lala dhacayay?”ayay tidhi Sahra Halgan.
Waxaanay intaasi ku dartay “ waxaan umadda reer Somaliland u sheegayaa inay berri sagaalka subaxnimo u furantahay Xafladda xuska Shuhadadda SNM ee Hudheelka Hidp-dhowr ka dhacaysaa, cid is hortaagi karta iyo cid aanu xoriyad u waydiisanaynaa toona aanay Jirin, qof kastaana uu ka soo qayb geli karo haday tahay Mujaahid iyo haday tahay muwaadin kale oo waddanka u dhashay” ayey hadalkeeda raacisay.
Muj. Sahra Halgan oo ka biyo diidsan go’aanka Xukuumadda ka soo baxay ee lagu hor-istaagay Xaflada ay u diyaarisay xuska dadkii ay halganka soo wada galeen ee dhintay, isla markaana dawladda ku cannaanaysa talaabadan lagu cabudhinayo , ayaa tidhi “ annagu lacag kaga dooni mayno, xil kaga dooni mayno, dan kalena kama lihin, ee anigaa isxilqaamay oo go’aansaday inaan xusuus u samayno kuwii aanu dhamacda soo wada galnay ee Shihiiday, kuwii aan anigoo dumar ahi wax ka aasay ee dagaalka ku dhintay”.
Diidmo lagu cabudhinayo Dulmanayaasha
Ma jiro wax war ah oo ka soo baxay dhinaca dawladda oo lagu sababeeyay go’aanka Wasaaradda daakhligu ku joojinayso Munaasibadan, balse sida muuqata waa talaabo lagu cabudhinayo Hogaamiyeyaasha Asxaabta Mucaaridka ah iyo Madasha Wada-tashiga oo aan inta badan lagu soo casuumin Xaflada ay Jimciyada Sooyaal soo qabanqaabisay oo ay Xukuumaddu door weyn ku leedahay.
Sida ay Gobanimonews ka heshay xoggo u dhuun daloola amarkan lagu joojisay xaflada Sahra Halgan bixisay, ayaa sheegay inay xukuumaddu ka cabsi qabto in Baarqabada SNM ee Madasha Wada-tashiga ku bahoobay iyo Mucaaridka oo iskaashanayaa, ay xafladaas ku dhaliilo siyaasaddeed oo Dhimbiil daba ku ah ay uga soo jeediyaan.
Hase ahaatee waxa muuqata inaanu isku daygan fashilmay Wasiirka amnigu bixiyay ahayn mid baajinaya Abaabulka ay Mujaahidiinta SNM ee Sahra Halgan iyo cid kasta oo maceeda ahi ugu jiraan siday u qaban lahaayeen Xaflad ka reeban Guul-wadeyn Siyaasaddeed iyo inaan la sheegin Duruufaha ku gedaaman hadhaagii kuwa la xusay ee ay qaarkood Agoonta kaga tageen ifka.
Waxaana xusid mudan inay Xukuumadda Madaxweyne Siilaanyo afartii sanno ee ay talada haysa cidi caaraddeed wax qabad lagu qiyaaso aanay u tarin Tafiirta Mujihiintii dhintay ka hadhay iyo kuwa Nool ee kala dhantaalan midna.
Saleebaan Cabdi Cali (Kalshaale)
Gobanimonews
Hargeysa Office
Email: curad1986@hotmail.com