Hargeysa(GNA)-Xukuumadda Somaliland ayaa shardi ku xidhay dadka la siinayo Baasboorka cusub ee electronic-ga ah, kaasoo dadka doonaya inay qaataan laga doonayo Waraaqda Dhalashada ee cusub, taasoo lagu bixinayo Diwaan-gelinta Medeniga ah.Masuuliyiinta Somaliland ayaa sheegay in qorshahan cusub looga danleeyahay si aanay Baasboorka u qaadan dadka aan waddanka u dhalan ee ka yimaada meelaha ay ammaan daradu ka jirto ee Somaaliya. “ Maanta laga bilaabo ma qaadan karo Baasboorka qof aan qaadan Teesarada dhalashadu, markaa waa inay dadku isdiwaan-geliyaan oo ay soo qaataan Waraaqda Dhalashada intaanay halkan iman” sidaasi waxa Warbaahinta u sheegay Salaasadii todobaadkan Wasiirka Arrimaha gudaha Somaliland Cali Maxamed Waran-cadde.
Waran-cadde, ayaa intaasi raaciyay “Somaliland waxay u gudbaysaa nidaam lagu kala aqoonsanayo qofka muwaadinka ah iyo ajaanibka “ayuu yidhi isagoo ka qayb gelay Munaasibad kooban oo uu madaxweyne Ku-xigeenka ahna ku-simaha Madaxweynuhu ku qaadanayay Baasboorkan cusub.
Madaxweyne ku-xigeenka Somaliland Cabdiraxmaan Cabdilaahi Ismaaciil Saylici oo isna ka hadlay qaadashada E. Baasaboorka, ayaa sheegay “hada waxaa loo gudbay nidaamka Electronic Passport-ka, si loo xakameeyo Khataraha adduunka ku soo kordhay ee nabad-gelyo darada abuuraya, markaa waxaa farxad weyn inoo ah inay la jaanqaadno nidaamkaa cusub ee socdaalka adduunku isu bedelay “ ayuu Saylici.
Taliyaha Laanta Socdaalka Gaashaanle sare Maxamed Cali Cambaro , ayaa Madaxweyne ku-xigeenka ku wareejiyay Baasboorka cusub ee uu qaatay oo ah mid Diblomaasi ah (Diblomat Passport), waxaanu taliyuhu caddeeyay in qaateyaasha baasaboorka looga baahanyahay Waraaqaha caddeynta Dhalashada.
Gaashaanle sare Cambaro, ayaa sii tahkiidiyay amarka Wasiirka arrimaha gudaha ee ku saabsan shuruuda lagu qaadanayo Dal ku galka cusub ee Somaliland.
Wariye ka tirsan Gobanimonews oo booqday Xarunta laanta Socdaalka ee laga qaadanayo Baasaboorka, ayaa la kulmay dad badan oo loo samaynayo Passport-ka, kuwaasoo sheegay inay soo qaateen Formka Dhalashada ee lagu bixinayo Diwaan-gelinta socota .
“haa waxaan soo qaadanay Form-kii diwaan-gelinta, iminkana waxaa naloo samaynayaa Baasaboorkii cusbaa, kii hore ayaan haysanay hadana kan cusub ayaa qaadanaynaa” sidaasi sheegtay haweenay ka mid ah dadkii safafkaugu jiray Epassport-ka.
Sicirka isku bedelka Epassport cusub iyo dal ku galkii hore
[caption id="attachment_99923" align="alignleft" width="300"]
Saylici oo qaadanaya EPASSPORT-ka cusub[/caption]Dadka haysta Baasaboorkii hore Somaliland, ayaa loogu bedelayaa kan cusub, balse ma jirto wax qiimo dhimis ah oo loo sameeyay, maadaama oo ay hore lacag ku qaateen. “ Qiimaha Baasaboorku waa isku mid qof walba waxa laga doonayaa $155 Dollar” sidaasi waxa Gobanimonews u xaqiijiyay Taliyaha Laanta Socdaalka.
“Bedelka iyo qaadashada cusub waa isku lacag, waxba laga dayn maayo dadka haysta Dal ku galkii hore ee loo bedelayo waxa laga doonayaa uun lacagta laga qaadayo qofka hada qaadanaya “ ayuu yidhi Muwaadin loo bedelayo Baasaboorkii hore oo cabasho muujiyay.
Laakiinse dadka arrintan ka cabanaya iyo dadka aqoonta Maamul leh, ayaa ka biyo diidsan Qiimaha lacagta laga qaadayo Dadka loo bedelayo Baasaboorka, “waxay ahayd in qofka loo bedelayo laga qaado kala badh ama wax yar oo dul-saar ah, tusaale ahaan $30 Dollar, laakiinse sidani waa khalad iminka wax u socdaan” ayuu yidhi Axmed oo ah Khabiir ku ah arrimaha Maamulka dawliga ah.
Laba howlood oo isbarbar socda
Madaxweynaha Somaliland ayaa bishii la soo dhaafay furay qaadashada Baasaboorka cusub, isagoo ahaa qofkii ugu horeeyay ee la siiyay.
Si kastaba ha ahaatee howlaha Diwaan-gelinta Medeniga ah iyo bixinta Baasaboorka cusub ayaa ah kuwo is barbar socda oo wakhti dheer qaadanaya, inkasta oo ay Golaha Guurtida dalku shalay joojiyeen ansixinta Xeerka Diwaan-gelinta Muwaadiniinta iyo codbixiyeyaasha oo Golaha Wakiillada hore u soo ansixiyeen.
Diidmada Guurtida ee Xeerkan ayaa saameyn ku yeelan kara sii socoshada Diwaan-gelinta Medeniga ah iyo codbixiyeyaasha oo haatan ka socota Gobolka Maroodi-jeex oo lagu bilaabay.
Saleeban Cabdi Cali
Gobanimonews
Hargeysa Office
Email: editor@gobanimonews.com