Hargeysa(GNA)-Madaxweynaha Somaliland Axmed Maxamed Maxamuud Siilaanyo ayaa badhasaabka Buuhoodle u magacaabay Cismaan Ciise Maxamed Aadan (Cismaan Ciire Rawe), sidaa waxa lagu sheegay Digreeto ka soo baxday Madaxtooyada goor dambe oo Khamiistii ah.Magacaabistan ayaa ahayd mid maalmahanba si weyn loogu dhegtaagayay, iyadoo ay dad badan oo xogogaal ahaa, si weyn u hadal hayeen goorta uu siilaanyo ku dhawaaqi doono.
Waxa uu madaxweyne Siilaanyo xilkii ka qaaday ku-xigeenkii hore ee Gobolkan khilaafka siyaasaddeed kaga maqan gacanta Somaliland 23 sanno, kaasoo ahaa ku simaha guddoomiyaha, xataa intii ay saddexdii sanno ee u dambeeyay ay sii fogeeyeen shacbiga, colaadihii ka dhacay Kalshaale iyo nawaaxigeeda.
Magacaabista
“Madaxweynaha Jamhuuriyada Somaliland, Mudane. Axmed Maxamed Silaanyo waxa digreeto madaxweyne oo sumadeedu tahay JSL/M/XERM/249-2823/102014,Xilkii uu qaranka u hayey kaga qaaday Guddoomiye Ku-xigeenkii Hore ee Gobolka Buuhoodle, isla markaasina waxa uu madaxweynuhu Gudoomiye Cusub u magacaabay Gobolka, halka Gudoomiye ku xigeenkii Xilka laga qaaday aan weli la soo magacaabin masuul buuxiya madaxweynuhuna uu dib ka soo magacaabi doono.
Madaxweynuhu:-
Markuu Arkay: Qodobka 90aad ee Dastuurka Jamhuuriyadda Somaliland;
Markuu Arkay: Qodobka 110aad ee Dastuurka Jamhuuriyadda Somaliland;
Markuu Tixgeliyay: Ahmiyadda ay Gudoomiyeyaasha Gobolladu u leeyihiin dhismaha Qaranka;
Markuu Garwaaqsaday: In baahi loo qabo buuxinta xilka Gudoomiyaha Gobolka Buuhoodle;
Markuu La Tashaday: Madaxda ay hawshani khusayso;
Markuu ku qancay: In uu hanan karo xilkan;
Wuxuu go’aamiyay
In Mudane, Cismaan Ciise Maxamed, laga bilaabo taariikhda maanta uu ahaado Gudoomiyaha Gobolka Buuhoodle ee Jamhuuriyadda Somaliland.
Muxuu soo kordhin doona maamulka cusub?
Masuulkan la magacaabay oo ah dhalinyaradii ku soo barbaartay Magaalada Buuhoodle, wixii ka dambeeyay burburkii nidaamkii milateriga ahaa 1991-kii, waxa uu haystaa fursad uu uga faa’idaysan karo maamul daadejinta deegaamada Gobolka siiba talowga Buuhoodle oo ka go’aan xagga kala dambeynta iyo nidaamka dawladnimo Somaliland.
Waxa uu kursiga ugu sareeya ee Buuhoodle qabanayaa iyadoo xaalad degenaanshiyo ah lagaga nastay colaadii wajiyada badan lahayd ee deegaamada Gobolka ka taagnayd saddexdii sano ee u dambeeyay.
Waxa ay fursadi uga furantahay inuu la hadlo oo uu kaashado dhalinyarada qoriga sidatay, isla markaana kasbado waayeelka iyo inta wax laga dhegeysato ee Magaalada Buuhoodle.
Waxa uu tegi karaa Buuhoodle maalmaha ugu horeeya ee howl-gudashadiisa, marka ay wada socdaan ama ay mabaadii’ da siyaasada isku mid ka yihiin Wasiirka looga dambeeyo Buuhoodle ee Xaglo-toosiye.
Inkasta oo aanu isaga laftiisu ahayn Nin miisaan yar ku leh gobolka, kana soo jeedo Caa’iladii uu ka dhashay Alle ha naxariistee Guddoomiyihii hore ee Baarlamanka Somaliland Axmed Maxamed Aadan Qaybe oo ay walaalo yihiin guddoomiyaha cusub aabbihii, hadana waxa iska cad inuu hada Xaglo-toosiye arrimaha Buuhoodle gacantiisa ku maamulo.
Si kastaba ha ahaatee lagama sugayo Guddoomiyahan cusub inuu bilaabo hir-gelinta Mashaariic wax tar u ah Bulshada Deegaamada Gobolka, sababtoo ay tahay way yaryihiin dadka reer Buuhoodle ee dhuuntoodu u daloosho waxtarka Somaliland ilaa nabad iyo isfaham la gaadho.
Waxaanay taasi ku imanaysaa siyaasad cusub oo ay xukuumadda siilaanyo ku badhi taarto Ninkan dhalinyarada ah ee ay u magacowday Maamulka Gobolka.
Gobanimonews
Hargeysa Office
Email: editor@gobanimonews.com