London (GNA)- Magaalada London, waxa maanta si rasmi ah uga fumay shir Caalami ah oo maalgashiga iyo ganacsiga Somaliland lagu dhiirri-gelinayo (UK-Somaliland Investment and Trade Conference), kaas oo ay ka qayb-galeen madaxweyne Axmed Maxamed Siilaanyo oo ay weheliyaan wefti ka kooban golihiisa Wasiirrada, madax iyo Ganacsato dalka u dhalatay, iyada oo lagu marti-qaaday shirkado caalami ah iyo dibloomasiyiin ka socda waddamada Somaliland ka taageera dhinacyada dimuqraadiyada iyo horumarinta oo dawladda Ingiriisku ka mid tahay.Shirkan oo ay soo qaban-qaabadiisay Shirkad magaceeda la yidhaahdo Developing Market Associates (DMA) oo hore u qabatay shirar noocan oo loo qabto xidhiidhka ganacsi iyo maal-galineed ee dawladda Ingriiisku la wadaagto dalalka Afrika iyo Eeshiya qaarkood, ayaa muhiimada ugu weyn ee uu leeyahay waxay tahay in Maal-gashadeyaasha Uk iyo kuwa ka soo jeeda dalalka kale ee madasha ku sugan sharaxaad buuxda laga siiyo fursadaha Maal-gashi ee Somaliland ka banaan.
Shirkan oo la filayo inuu caawa soo gabagaboobo, ayaa waxa uu ku soo beegmay, iyadoo ay Wasaaradda Ganacsiga Somaliland dib u habayn iyo casriyeyn ku soo samaysay hanaanka diwaan-gelinta Maal-gashadeyaasha Caalamiga ah iyo kuwa wadaniga ah. Balaadhina ku samaysay xafiisyada lagu diwaan-geliyo oo gobollada laga sameeyay.
Wasiirka Dawlada Ingiriiska u qaabilsan Maal-gashiga iyo arrimaha Afrika ayaa ka mid ah masuuliyiinta dawladda Ingiriiska uga qayb-galay Shirka, kaasoo ay weheliyaan Ganacsadeyaal iyo khubaro kala duwan.
Madaxweynaha Somaliland Md Axmed Maxamed Maxamuud oo khudbad ka jeediyay Shirka, ayaa sharaxaad dheer ka bixiyay fursadaha Ganacsi ee Somaliland, geediga Siyaasaddeed ee dalka iyo himilada mustaqbalka, waxaanu si cad farta ugu fiiqay inay soo dhaweynayaan cid kasta oo Maal-gashi ka samaysanaysa.
Wariye ka qayb-galay Shirka, ayaa sheegaya inuu shirku yahay mid si weyn u dhiiri gelinaya maal-gelinta dhinaca Ganacsiga ee Somaliland, iyadoo ay tahay markii ugu horaysay ee ay Uk, Shirkan oo kale qabato, isla markaana fursad siiso Ganacsiga Somaliland.
Maamulaha Guud ee Shirkadda Dahabshiil oo ka mid ah Ganacsatada waddaniga ah ee ka qayb-galay Shirkan ayaa BBC-da u sheegay inay soo dhaweynayaan Shirkan.
Shirkan ayaa waxa uu ku soo beegmay, iyadoo bilow tahay siyaasadda Maal-gashiga Somaliland oo ay hagayso Wasaaradda Ganacsiga iyo Maal-gashiga Somaliland.
Siyaasadda cusub ee Maal-gashiga Somaliland waxa ka mid ah wax ka bedel iyo Kaabis lagu samaynayo Sharciga Ganacsiga iyo Maal-gashiga, kaasoo lagu salaynayo hanaanka Caalamiga ah ee Maalgashiga, siiba qaabka ugu casrisan ee ay u shaqeeyaan wadamada uu ka jiro nidaamka Ganacsiga xorta ahi, sida ay Gobanimonews u sheegeen saraakiisha Wasaaradda Ganacsiga iyo Maal-gashiga Somaliland.
Gobanimonews
London Office
Email: editor@gobanimonews.com