Muqdisho, 14, October, 2014-(GNA)-Heshiis ayay wada gaareen Puntland iyo Dawladda Federaalka Somalia Salaasada Maanta.Heshiiska ayaa ka kooban dhowr qodob oo labada dhinac midba dhinac u khuseeya, waxaana ugu waaweyn inay labada dhinac sameeyaan saami qaybsi siman oo dhinaca dhaqaalaha, mucaawimooyinka iyo siyaasada ah.
Waxa kale oo ka mid ah Heshiiska in la dhiso ciidamo isku dhaf ah oo Puntland ka howl-gala la dhiso, in Gobolka Mudug qaybtiisa waqooyigu mid noqoto Puntland iyo in qorshe laga yeesho qaabka loo qaybsanayo Heshiiska qorshaha cusub ee New deal conpact.
Reysal- wasaaraha Soomaaliya Cabdi sheikh Maxamed Axmed oo booqasho ku jooga Magaalada Garoowe tan iyo markii uu furmay shirka wada hadalada oo socday saddex maalmood iyo Madaxweynaha Puntland Cabdiwali Maxamed Cali Gaas ayaa labada dhinac u saxeexay heshiiskan oo qodobaysan.
Labada hogaamiye ayaa si rasmiya u soo dhaweeyay heshiiska.
Ra’iisul Wasaaraha Xukuumadda Federaalka Soomaaliya Cabduweli Sheekh Axmed Maxamed, ayaa ku tilmaamay heshiiska mid taariikhiga ah oo ay kala saxiixdeen dowladda dhexe iyo Puntland, wuxuna ku tilmaamay heshiiska inuu yahay horrumar iyo tallaabo wanaagsan oo loo qaaday dhanka dib-u- heshiisiinta iyo dhismaha dowladdo federaal ah.
Cabdiweli Sheekh Axmed ayaa ku ammaanay xubnaha guddiyadii ka socday dowladda dhexe iyo maamulka Puntland ka mirro dhalinta iyo ka gudbidda qodobadii labada ku kala aragti duwanaayeen, isagoona tilmaamay Wadahadalkan qaatay saddexda maalmood in uu muhiim u yahay iskaashiga xukuumadda federaalka Soomaaliya iyo dawlad-goboleedka Puntland ee Soomaaliya.
“Xukuumadda Federaalka Soomaaliya waxay soo dhaweyneysaa heshiiskii taariikhiga ahaa ee maanta gaareen dowladda dhexe iyo Puntland, waxaan sii wadi doonaa dhiiri gelinta iyo taageerada heshiiska, Xukuumaddu waxay diyaar u tahay inay qeyb ka qaadato hirgelinta iyo dhamaystirka heshiiskan oo ah mid bilow u ah horumar waara oo laga gaaro mad-madowgii jiray” ayuu yiri R.W Cabdiweli.
Dhinaca kale Madaxweynaha Puntland Cabdi wali Maxamed Cali Gaas, ayaa heshiiskan ku tilmaamay mid istijaah cusub lagu waajahayo, kaasoo uu sheegay in tan iyo maalin saddexaad la soo xaro-dhaaminayay si xal loo gaaro.
Gaas, ayaa sheegay inuu ku qanacsanyahay heshiiskan, waxaanu intaasi raaciyay in isfahamkani meesha ka saari doono madmadowgii soo kala dhex galay labada Maamul bilihii la soo dhaafay, kaasoo saameyn ku yeeshay wada shaqaynta iyo xidhiidhka.
Inta badan dhaqan gelinta heshiiskan iyo arrimaha Dastuurka qaybta ka khusaysa waxa ka wada hadlaya Baarlamanka labada Maamul, sida ku xusan nuqulada heshiiskan.