Roy Keane waxa uu buug xusuus qor ah oo dhawaan la daabacay ku xusay in markii uu telefoonkaasi soo dhacay uu si degdeg ah uga jawaabay isaga oo cabsi dareemaya, isla markaana uu gaashaanka ku dhuftay dalabkaas.
Keane waxa uu si murugo leh ugu xariiqay xusuus qorkiisa in uu si aad ah uga qoomamooday in uu diiday dalabkaas, inkasta oo dalabkaas aanu filaynin uu jewi deganaansho la’aan ah ku riday xiddigan khadka dhexe.
Buuggan oo lagu magacaabo ‘The Second Half’ oo afka Soomaaliga ku noqonaysa ‘Qaybtii Labaad’, waxa uu intaa ku daray in wakiilkiisa Michael Kennedy uu ku sii wargeliyey in uu dalab ka heli doono agaasimaha ciyaaraha ee Real Madrid, Emilio Butragueño.
“Michael ayaa tibaax isiiyey ah in uu Emilio Butragueño isoo telefoonin doono, dabeeto telefoonkayga ayaan u qaadan jiray meel walba. Bal ka waran nasiibka, waxa uu isoo garaacay aniga oo suuliga / musqusha dhex fadhiya” ayuu Keane ku yidhi Buuggiisa The Second Half.
Xiddigan ka soo jeeday Ireland, waxa uu intaa ku daray: “Waxaan u qiimayn lahaa dalabka Real si weyn. Waxa uu ahaa waxa ugu weyn ee i horyaalley, laakiin maan aqbalin. Waxa ay naftaydu igu lahayd: ‘Orod oo tag Spain, ku noolow halkaa sannad iyo badh, luuqadda soo baro, dhaqanka baro”.
“Waxa aan qaatay go’aan khaldan. Cimilada iyo tababarka ayaa soo yareeyey in aan laba sannadood oo dambe sii ciyaaro. Waxa ugu badan ee igu kellifay go’aankaasi wuxuu ahaa cabsi, waxaan ka baqayey wax aan la ogeyn (Mustaqbalka)”. Ayuu yidhi.
Ruug caddaagan wakhtiga dheer rukunka u ahaa Manchester United, waxa uu buuggiisa The Second Half ku qoray waxyaabo badan oo la xidhiidha noloshiisa, gaar ahaan ciyaaraha iyo go’aamo uu ka qaatay mustaqbalkiisa intii uu ku jiray garoomada.