Garoowe, 13, October, 2014-(GNA)-Ra’iisul Wasaaraha Xukuumadda Federaalka Soomaaliya Cabdiweli Sheekh Axmed Maxamed ayaa axadii shalay ka qaybgalay xaflad ballaaran oo lagu xusayey sannad-guurada lixdanaad ee maalinta qaran ee calanka Soomaaliya oo lagu qabtay hoolka shirarka ee Jaamacadda Bariga Afrika faraceeda magaalada Garoowe ee xarunta Puntland.Xuska maalinta Calanka Buluuga ah ee Soomaaliya ayaa laga xusay meelo badan oo ay soomaalidu ku nooshahay, waxaana ka mid ah Xaflad xus ah oo lagu qabtay xarunta Safaaradda Soomaalida ee Imaaraadka Carabta oo habeenkii Axaddu soo gelaysay. Calanka Soomaaliya ayaa sannad walba la xusaa 12-ka bisha October oo ah maalintii la sameeyey ee sannadkii 1954-tii.
Munaasibadda lagu qabtay maalinta calanka Soomaaliya waxaa Ra’iisul Wasaare Cabdiweli ku wehelinayey Madaxweynaha Puntland Mudane Cabdiweli Maxamed Cali Gaas iyo Madax kale oo ka tirsan Dawladda Federaalka Soomaaliya iyo Puntland, iyadoo sidoo kale ay madasha fadhiyeen arday, waxgarad, aqoonyahanno iyo dhammaan qaybaha bulshada. “Maanta waa maalin ku weyn taariikhdeenna iyo dawladnimadeena. Waa maalintii aynu yeelanay calankan qiimaha badan oo astaan u ah haybteenna Soomaalinimo. Waxaan ugu hanbalyeynayaa maalintan dhammaan shacabka Soomaaliyeed meel kasta oo ay joogaan. Waa in aynu xusnaa oo farxad ugu dabaaldegnaa maalintan. Sidaasi ayuu yiri Ra’iisul Wasaaruhu
“Calanku waxa uu xanbaarsan yahay micno weyn oo ah midnimadeena iyo qaranimada aynu kaga mid nahay adduunka.Waxaan ku bogaadinayaa shacabka Puntland iyo maamulkooda rabitaanka sarreeya ay u hayaan midnimada iyo calanka Soomaaliya”. Ayuu raaciyey Mudane Cabdiweli
Madaxweynaha Puntland Mudane Cabdiweli Maxamed Cali Gaas oo isaguna hadal ka jeediyey madasha lagu xusayey Maalinta Qaran ee Calanka Soomaaliya ayaa shacabka Soomaaliyeed ugu hanbalyeeyey maalintan muhiimka ah, isagoo tilmaamay in loo baahan in loo wada hawl galo sidii loo celin lahaa sharftiisa.
Dhinaca kale, Isla xafladan lagu qabtay hoolka Jaamacadda Bariga Afrika ee magaalada Garoowe ayaa qayb ka mid ah lagu daahfurayey olole qaran oo lagu gargaarayo dadka gobolka Gedo ee ay abaaruhu halakeeyeen.
Madaxda Jaamacadda Bariga Afrika ayaa soo jeedisay in shacab iyo dawladba laga wada qaybqaato oloaha qaran ee gargaarka loogu fidinayo dadka Gobolka Gedo. Ra’iisul Wasaaraha Xukuumadda Soomaaliya Mudane Cabdiweli Sheekh Axmed iyo Madaxweynaha Puntland Mudane Cabdiweli Maxamed Cali Gaas ayaa dadka Soomaaliyeed iyo beesha caalamkaba ugu baaqay in gargaar degdeg ah loo fidiyo dadka Gobolka Gedo iyo gobolada kale ee abaartu ka jirto, iyagoo sheegay in Dawladda Federaalka iyo Puntland ay gargaarkaasi qayb weyn ka qaadanayaan.
Ugu danbayntii, Guddoomiyaha Jaamacadda Bariga Afrika Mudane Aadan Sheikh Doon ayaa Ra’iisul Wasaaraha Xukuumadda Federaalka Soomaaliya Cabdiweli Sheekh Axmed guddoonsiiyey shahaado sharaf uu ku mutaystay hoggaamintiisa wanaagsan iyo halganka uu ugu jiro nabadaynta iyo adkaynta dawladnimada Soomaaliya.
Xaflado kale oo lagu xusayay maalintan ayaa ka dhacay gudaha dalka iyo meelo kale oo dibada ah, kuwaasoo kor loogu qaadayo qiimaha calanka soomaaliya.
Laakiinse Gobollada Somaliland oo gooni isu taaag ku dhawaaqay sanadkii 1991-kii ayaan laga xusin, laga taageersanayn calankan oo markii ay midoobeen waqooyi iyo Koonfur ay wada qaateen.
Somaliland ayaa leh calan u gaar ah oo ka duwan kan soomaaliya, iyadoo aanay wax astaan ah xataa la wadaagin calanka buluuga ah sida Maamulka Puntland oo kale.
Gobanimonews
Laascaanood Office
Email: editor@gobanimonews.com