Hargeysa(GNA)-Afhayeenka Madaxtooyada ayaa u muuqda inuu Jawaab deg deg ah ka bixinayo war sheegaya inuu Madaxweyne Siilaanyo ka tanaasulay musharaxnimada Madaxweynaha ee Xisbiga Kulmiye, kaddib markii ay warbaahintu maanta soo bandhigtay xogo laga helay Madaxtooyada oo dood badan dhaliyay.Dhuxul oo hadlay saacado yar kaddib markii warkani dalka oo dhan wada gaadhay, ayaa ku doodday inaanu madaxweynuhu wax tanaasul ah bixinin, isla markaana uu ku taaganyahay mowqifkiisii hore ee ahaa inuu mar labaad isu soo taago hogaaminta dalka.
Waa dhab oo Madaxweyne Siilaanyo wuxuu horey u caddeeyey inuu kursiga sii joogi doono hadii mar labaad loo doorto, isagoo shacbiga cod waydiisan doona, kuna tartami doono doorashada. Hase ahaatee micno badan ma samaynayo go’aan ka noqosho oo uu haatan kaga laabto arrintaasi, waayo waxa uu xisbigiisu lumiyay awooddii taageero ee Bulshada iyo Kalsooni badan oo deegaan.
Difaaca Afhayeenkiisa
Dhuxul oo la hadlay mid ka mid ah Baraha internetka ee dawladda taageera ayaa duray warbaahinta Madaxweynaha damaciisa ka faalooda.
“Waxaan halkan ka caddaynayaa in Madaxweynaha Somaliland Mudane Axmed Maxamed Maxamuud Siilaanyo uu u taagan yahay murrashaxna u yahay doorashadda madaxtooyadda ee lagu wado inay dalka ka dhacdo, waxa kale oo aan beeninayaa war maanta ay daabaceen wargeysyadda Ogaal iyo Geeska afrika oo ahaa mid been abuur ah oo aanay waxba ka jirin, ma jirto meel madaxweynaha Somaliland kaga hadhay tartanka doorashada, waxaanu u sharaxan yahay kalkiisa labaad ee dastuurka dalku u baneeyay,”ayuu yidhi Afhayeenka Madaxtooyaddu.
Si kastaba ha ahaatee hogaamiyaha ruuxiga ah ee Xisbiga kala daadsan Axmed Maxamed Maxamuud Siilaanyo, waxa uu haatan u muuqdaa siyaasi da’ fur ah oo kala dooranaya inuu xilka ka dego marka uu wakhtigii la doortay ka dhamaado iyo inuu sanado kale ku sii negaado saaxada loolanka, xataa hadii uu helo muddo kordhin labo sanno ah.
Gobanimonews
Hargeysa Office
Email: editor@gobanimonews.com