Geerisa(GNA)-Warar naga soo gaadhay deegaamada u dhexeeya Gobolada Awdal iyo Selel, ayaa sheegaya inay Carruur yar iyo dad kale oo waayeel ahi ku sumoobeen Sharaab iyo cuntooyin kale oo lagu daadiyay Banka Geerisa iyo meelo kale.Mid ka ka mid ah Waxgaradka Deegaamadaas ayaa Gobanimonews u sheegay in Shuban iyo Hunqaaco, ay dadkaasi kala joojin waayeen markii ay cabbeen cuntooyinkan, isla qaarkood loola cararay dalka Djibouti oo si xaaladdooda caafimaad loola tacaalo.
Sarkaal hore dawladda u shaqayn jiray, ayaa isna Gobanimonews u sheegay in Raashinkan ay dadku ku sumoobeen, ay u daadiyeen Gawaadhi ka tagtay Boorama oo Saylac ku socday, waxaanu intaas ku daray inaanay hada laamaha nabad-gelyada iyo kuwa adeegyada aasaasiga ahi wax talaabo ah oo dhacdadan lagu baadhayo qaadin.
“waxa naloo soo sheegay in carruur iyo dad kale oo waayeel ahiba ku sunnoobeen Sharaab iyo Buskut loogu daadiyay banka oo ay cunneen”, ayuu yidhi Sarkaalkan oo ka cudur daartay inaan magaciisa soo xigano balse ka mid ah dadka deegaankaas ka soo jeeda.
Waxaa uu intaas ku daray “Dadkii qaarbaa jabuuti loo qaaday, qaarna wali way jiifaan.” Ayuu hadalkiisa raaciyay.
Ma jiro wax war ah oo ka soo baxay Maamulka Dawladda ee heer Gobolka iyo mid deegaan toona oo dhacdadan looga hadlayo.
Gobanimonews
Saylac Office
Email: editor@gobanimonews.com