Berbera(GNA)-Nin hubaysan ayaa saaka arroornimadii hore rasaas ku furay Guddoomiyaha Waxbarashada Gobolka Saaxil ee Somaliland, kaasoo ahaa isku day dil balse uu ka badbaaday.Dad goob-joogeyaal ah ayaa sheegay in Ibraahim Digaale oo ahaa Guddoonka waxbarashada ee Gobolka uu rasaas ku furay Nin Macalin ka ah Dugsi waxbarasho oo ku yaalla Magaaalada Xagal oo dhinaca bari kaga beegan Berbera, kaasoo ay Guri wada joogeen.
Falka ayaa dhacay Hiirtii hore ee subaxnimada Axada Maanta, wakhti ku beegnayd markii salaada Subax loo kacayay.
Ninkan falka geystay oo magaciisa lagu sheegay Khayre, ayaa ciidanka Bilaysku gacanta ku soo dhigeen isla markiiba, waxaana loo taxaabay Xabsiga, sida uu ku waramay wariyaha Gobanimo ee Gobolku.
Sarkaalka la weeraray, ayaa waxay rasaastu kaga dhacday Bowdada Midig oo sida ay saraakiisha Caafimaadku sheegeen ay ka jiidhaysay xabbadu.
Ninka weerarka geystay ayaa la sheegay inuu wakhti sii horaysay sidan oo rasaas ugu riday Sarkaal la shaqeeya Hay’ad dhinaca Waxbarashada ka caawisa Wasaaradda Tacliinta ee Gobolka Saaxil.
Sida laga soo xigtay Saraakiisha Nabad-gelyada ee gobolka, toogashada hore ee uu ku kacay ayaan wax waxyeelo ahi ka soo gaadhin Sarkaalka uu weeraray.
Isku dayga dil noocan oo kale ah ayaa u muuqda mid salka ku haya ismaan-dhaaf Maamul ama shakhsi oo inta badan dhex mara dadka ka shaqeeya xafiisyada dawladda.
Hase ahaatee waa dhacdadii u horaysay ee uu Macalin xabbad ku weeraro Maamulkiisii uu la shaqaynayay.
Gobanimonews
Burco Office
Email: editor@gobanimonews.com