Sanca(GNA)-Ugu yaraan Afartameeyo ruux ayaa ku dhintay weerar isqarxin ah Khamiista Maanta, kaddib markii Ruux isku soo xiray bam uu weerar ku qaaday bar ay ku sugnaayeen Ilaalada Fagaaraha Taxriir ee Caasimada dalka Yemen ee Sanca.Qofka weerarka fuliyay ayaa isku soo xidhay Suun ka samaysan walxa qarxa, waxaana halkaas ku dhaawacmay tiro kale oo dad ah.
Fagaaraha Taxriir waxa ilaalo ka ah Maleeshiyaadka Shiicada ah ee loo yaqaan xuutiyiinta, kuwaasoo hogaaminaya dibadbaxyo looga soo horjeedo Reysal-wasaaraha xilka lagala noqday ee dalka Yemen Axmad Cawad Bin Mubaarak.
Ninkan ayaa Madaxweynaha Yemen Cabdurubux Mansuur uu u magacaabay reysal-wasaare, waxaana diidmadiisa ka dhashay rabshado iyo qul-qulatooyin siyaasaddeed oo hadheeyay dalka yemen.
Kooxda Xuutiyiinta ayaa qabsaday qaybo ka mid ah Magaalada Sanca, waxaanay taasi kicisay rabshado siyaasaddeed oo ka soconaya Magaalada Caasimada ee Sanca.
Weerarkan ayaa noqonaya kii ugu khasaaraha badnaa ee dhaca sanadkan dalka yemen.