Paris: October 14, 2014-(GNA)- Madaxweynaha Jamhuriyadda Federaalka ee Soomaaliya, Xasan Shiikh Maxamuud, iyo wafdi uu hoggaaminayo ayaa maanta ka degey magaalada Paris ee caasimadda Waddanka Faransiiska. ka dib markii uu martiqaad ka helay Madaxweynaha dalkaas François Hollande.Booqashada Madaxweynaha ee Waddanka Faransiiska ayaa maalmahanba si weyn loo hadal hayay, hase ahaatee xogo rasmiya lagama hayo ujeedada uu daaranyahay, marka laga yimaado, filashada dadka saadaaliya arrimaha xidhiidhka caalamiga ah oo dhowr qodob ku aroorinaya socdaalkan Xasan Sheikh Maxamuud.
Dawladda Faransiiska ayaa hogaaminaysa Gulufka reer Galbeedka iyo xulafadooda ee la dagaalanka Budhcad-baddeeda Soomaaliya, ay midowga Yurub door muuqda ku leeyihiin.
Madaxweyne Xasan Sheikh Maxamuud ayaa horaantii sanadkan balanqaaday inuu dunida kala shaqayn doono dagaalka lagula jiro Kooxaha Budhcad-baddeeda ah, taasoo uu tilmaamay in lagu yarayn karo dib u dhis lagu sameeyo Ciidanka Badda Soomaaliya iyo in shaqo abuuris loo sameeyo Dhalinyarada qowlaysiga ku foogan.
Sida lagu sheegay war kooban oo saraakiisha Dawladdu ka soo saartay, waxa ay Labada Madaxweyne ka wada hadli doonaan iskaashiga xiriirka ka dhexeeya labada dal ee dhinacyada Difaaca, Amniga iyo Horumarinta.
Madaxaweyanaha waxaa wafdigiisa ka mid ah, Wasiirka Arrimaha Dibadda, Dr. Cabdiraxman Beyle, Wasiirka Difaaca, Maxamed Shiikh Xaamud, la Taliyaha Madaxweynaha ee Arrimaha Amniga, Cabdiraxman Shiikh Ciise iyo mas’uuliyiin kale.
Madaxweynaha iyo wafdigiisu waxay galabta booqdeen Safaaradda Soomaalida ee magaalada Paris.
Danjiraha Soomaaliya u fadhiya Midowga Yurub, Dr. Cali Siciid Faqi ayaa ku tilmaamay in ay tahay markii ugu horreysay ee Madaxweyne Soomaaliyeed iyo Madaxweynaha Faransiisku ay si rasmi ah isu soo hor fariistaan tan iyo markii ay burburtay Dowladdii Soomaaliya 1991.
Taasina waxay muujineysaa isu soo dhowaashaha Soomaaliya iyo Faransiiska iyo sida uu hadda caalamku ugu soo jeestay in uu iskaashi dhinacyo badan leh la sameeyo Soomaaliya.
Dalka Faransiiska ayaa ka mid ah wadamada Reer Yurub ee Dhaqaale ahaan, siyaasad ahaan iyo Milateri ahaanba ugu tunka weyn Midowga Yurub, kaasoo saameyn weyn ku leh mandaqada Bariga Afrika, siiba xeebaha dalalka ku yaalla Geeska.
Xog xaasaasi ah oo safarka Madaxweynaha laga helay
Mid ka mid ah xogaha xaasaasiyada xambaarsan ee ka soo baxaya booqashada madaxweynaha somaliya ee Paris ayaa tibaaxaya inuu la kulmi doono Shirkadda Shidaalka ee Total, laakiinse ma cadda waxay ka wada hadlayaan shirkadaas oo dhowr sannadood ka hor wayday Ganacsigeedii Geeska Afrika.
Shirkadda Total ayaa lumisay saddex sanno ka hor heshiis Ganacsi oo kala dhexeeyay Somaliland oo ah dawlad madaxbanaani kala soo noqotay Somalia burburkii nidaamkii siyaad barre kaddib.
Heshiiska Shirkadda Total ayaa waxa tir-tiray xukuumadda uu Madaxweyne Siilaanyo madaxda ka yahay, oo markii ay talada la wareegtay kala noqotay heshiiskii maamulka Haamaha Shidaalka ee Berbera oo Konton sanno inay gacanta ku hayso uu u saxeexay Madaxweynihii labaad ee Somaliland Marxuum Maxamed Xaaji Ibraahim Cigaal.
Laalista Heshiiskaas ee Maamulka Siilaanyo, ayaanay wali Isfaham ka gaadhin Shirkadda Total iyo Somaliland, inkasta oo shirkadda laga eryay dalka.
Gobanimonews
London Office
Email: editor@gobanimonews.com