Gabaygan waxa la yidhaahdaa Dib-qallooc. Waxa uu dabasocdaa Deelleeyda gu'yaalkan curatay ee kala ah Soodaata: heesta qaran ee Abwaan Jaamac Riyo, Garbadiir: Silsilad-suugaaneedka Abwaan Axmed Aw Geeddi furay iyo Gabaygii Digniin ee digashada u ahayd haweenka uu Wasiir Xirsi Cali Xaaji Xasan (Abwaan-dile) xabsiga u taxaabay, u duurxulay una hanjabay...
Waa diiwaan koobaya dulmiyo badan oo ay ku kacday xukuumadda Madaxweyne Siilaanyo muddadii ay talada haysay. Waa hiil saxaafadeed gaar ahaanna Wargeyska HAATUF oo nabar gardarro ku dhacay... Abwaan CUKUSE ayaa fasiri doona insha Allah..
Wuxuu yidhi:
Dahabooy Nadraay baadi-doon, waan ku deydeyaye
Xasan Ganay duruustuu na baray, yaan mid soo dariye
Lab haween u dooddiya misana, laba-dibleynaaya
Ragannimadu deyrkay lahayd, waa ka dibad-yaale
In dugaagga lagu biiriyaa, dhaanta derejayne
Xadhigaagga waan dibin-jaboo, diiday gama’iiye
Nin haween ku daabulay xabsigu, dacayda sii taagye
Cudur-daar masuul daaddafshaa, maag ku soo daraye
SOOLJAAY dabuubtaydan tebi, daw-bax loo simane
Daljir Xaashi, Diric Geeljirow, Darartan Faalleeya
Madal toosin daaddihinaysaay, dunida gaadhsiiya
Da’yar sharaf leh, dumar dhawrsanow, deexdan falanqeeya
Dawi Cali-gurow, dooddan qaran, daaji baro khayr leh
Iidow haddaan duro nin goba, ha igu deynta beenta
Dul-ka-hoor gu’gii shuuxay bay, heego daba-taalle
Diillintii xanaaq baa ka dhacay, degel Guwaantaame
Dafka siidhi-wade yoomiyaan, laad ku deyayaaye
Darbaddayda gool-wade ku dhegi, dooddu may garane
Dulmi-soore, deelqaafku falay, gelinnay diiwaane
Dermadii markuu seexiyee, daawi xero-keenay
Doobbigoo sinnaan lagu cushuu, raadshay dulucdiiye
Dudduucii laf-dhabartaa “baf” tidhi, doogna lagu boobye
Diyaarado judhii loo dalbaday, Dubay la aadsiiye
Duqayntii, dubaaqiisu diid, debecna raadceeye
Cabdi-muumin duubiga ciddii, damaqday waa xay’e
Ma-naxii ku doorsaday hunguri, waynu dabaynnaaye
Daba-dhilif qofkii lagu suntaan, dooddu garanayne
Dulmi-soore, deelqaafku falay, gelinnay diiwaane
Barde duurka inala joogay amin, Doollo iyo Qaaxo
Dugayeeyda, milaygay darnayd, muu dalxiis tegine
Dila iyo Wajaalay heshiis, qalin ku-duugeene
Danankiyo rasaastay Berbera, kala dullaameene
Togdheer maalintii laysku duray, waydun demiseene
Cabdiyow dedaalkaaga libin, duunku wuu qoraye
Dildillaac, dannuu kaa xigsaday, hanad la diirtaaye
Docdocayn, dul-dhaaf iyo dab kulul, deebin lagu qoolye
Daraygiyo Ilaah baan ku dhigin, dooyo quudhsiya’e
Seylici damiirkii hagaan, dooddu garanayne
Dixi iyo dareen igu masaal, dalagga xoolaaye
RRU durduro-dhiig waddaa, ha i dawaarsheene
Sidan ahay dir iyo daabac qori, ha igu duudsiyo’e
Iyagoo degaankiyo ka siman, diinta iyo xeerka
Iyagoo dan-guud wada-jiroo, daawo wada qaatay
Burco hanadka daamaha ka dhigay, dooddu may garane
Guuleed qabtii laguu dallacay, dooddu may garane
Dulmi-soore, deelqaafku falay, gelinnay diiwaane
Gashaantida adoon dadab la gelin, guurna meher doonin
Reer Daammi, waa wada digtoor, daacad aan hubo’e
Dirindiirba waan naaxinnaa, maandhe deriskeenne
Dable iyo adeerow, xil-deri, daw umuu noqone
Derejiyo hoggaan way geyaan, doorna may heline
Dirsoocii wax loo xoojiyaan, dooddu garanayne
Halka Daakir laga raacaybaan, dooddu garanayne
Dulmi-soore, deelqaafku falay, gelinnay diiwaane
Dunji Awdal-Selel wuu dafiray, Soolna darayeeye
Docdocayn Sanaag-bari haddoo, daymo-nacab eegye
Widwidh, Keyse waxay daawadaan, daallin jeedalaye
Duub-weyne, Golihii duqiyo, daar wakiillada ah
Damallada garsoorkiyo dhammaan, dookh la magacaabo
Dibaddiyo gudaa, maalka-daye, taliyeyaal dooran
Yaa dulin ka dhigay Beesha Dhexe, dooddu may garane
Adigoon debbelin kaartadaad, Doollow uga baydhay
Ictiraaf la doondoonayaan, dunidu yeelayne
Khaatumo maxay diiddanyiin, dooddu may garane?
Yaa dilay Kalshaaloo berkado, duullan ku xigsiiyay?
Uurbeyte yaa dooliyoo, dabada riixaayay?
Yaa duumo, darafyada la jecel, dooddu may garane
Yaa dacaarka keligii hadhsaday, dooddu may garane
Yaa dalbaday harraad aan wacnayn, dooddu may garane
Dulmi-soore, deelqaafku falay, gelinnay diiwaane
“Dalkeennii nimcaa wada fadhida”, doobta lagu reenye
Dambarkeeda maatida lahayd, looma daro dhiile
Shaqallena daliilkuu cuskaday, waa daciif jabane
Nacnacow agoontaa dulmani, way ku deyayaayne
Adaa dirir leh, daaddihiya maxas, deeqna noo hura’e
Sahal baa dembaaboo qabruu, hoos u daaddegaye
Magaan duubtay, doorkiisibaa, duunyadii gura’e
Doxor qadiyay, gaarida dayacan, dooddu may garane
Dulmi-soore, deelqaafku falay, gelinnay diiwaane
Dameer ciyay, Iblays buu dalcado, daaqad ka arkaaye
Wax diig la qaaqinahayaa, daa’iraan jirine
Nin deyaysan waa loo fasaxay , inu dannaagaaye
Darandoorshe naasnaasinbaa, looga digayaaye
Daauus Qurxoonow xaraggo, duugtay quruxdiiye
In haweenka loo duurxulaa, way na damaqdaaye
Dumar kula salleello ah dhankay, lagama diirteene
Waa hooyo ii diir-naxdoo, ii dareen-nugule
Waa beerta dallageedu yahay, doombir aadmiya’e
Quddahaagu daardaar doc aan, loo durkeen amine
Waa darkii codeeyee ka qaday, dabaqay moorsheene
Shoolli-boolli daadduunsan baan, dooddu garanayne
Dulmi-soore, deelqaafku falay, gelinnay diiwaane
Dannood ma aha suugaantu dhure, lagu danqaaraaye
Dacwadaha abwaankii tirshaan, xaal u diraynnaaye
Diniiqow Salaan muu ahayn, goof dununuuca’e
Deexo Fadalyo Ina Kaahinbaa, dooxay sharaftiiye
Afartaasi Deelleyda shidan, diirin waw tahaye
Diir Geeddi furay raaciyoo, waa digniin-celine
“Soo-daata” baaq Jaamac bay, dulucda xoogayne
Gunaad iyo dabuub Weedhsamay, daba-gucleysaaye
Dib-qallooc Siciid waa u marag, “daallin” aan rabine
Eeggana kun daannaan Nadraay, daah-ka-rogayaaye
Darraataale Liibiya tahriib, dool-yar suudale’e
Imakaabay doonyuhu rarmaan, daabul Yurubeede
Daan iyo qadhiidh iyo cantuug, waw darsanaynaaye
Imakaaba diir lagu salliday, duuggi noo hadhaye
Eexdoo dalluun lagu libdhaa, dawlad loo yahaye
Imakaa dirsoociyo fajida, loo dabbbaal-degaye
Daribtiyo, darkeennii galool, wuu dubaaxsadaye
Imakaabu dabaq jeexayaa, diradiraaluhuye
Dooh iyo igmane aan la barin, dooji shacabkeennu
Imakaabu duuflaal amraa, daar maxkamadeede
Eeggana kun daannaan Nadraay, daah-ka-rogayaaye
Ducadiyo wanaaggii dheg-jaan, uma daloolaane
Imakaa inkaartuu dalbaday, lagu dannookhayne
Daacuun hadduu korodhsi yahay, daacadkiba eedye
Imakaanu diidmada qayaxan, boodhka daraynnaaye
“Dekeddiyo anaa bilis ka celin, doollar iyo moodka”
Dubaaqaygu weedh buu xifdiyay, maan ahayn doqone
Kobtu degay, damiirkaagi shalay, dooddu may garane
Danab Taanni, Seemaal darteed, duudka loo qabaye
Dallacaad waxaa helay Garaad, “Soo dilaay” yidhiye
Digreetada xujada loo cuskaday, dooddu may garane
Jidhifow diyaar waxad u tahay, daajin iyo nuure
Dugsi iyo hormoodnimo dhab-sheeg, maad qarweyn duhure
Dayr qudha adoon talinnin-baa, danab collowdeene
Dibindaabyaad geysataan, dooddu garanayne
Eeggana kun daannaan Nadraay, daah-ka-rogayaaye
Gebiley dalkeennay u tahay, door-labkii gobole
Denbigii Jamaal geystayee, Caabudla’da doohshay
Daryeelkii agoontay rabtiyo, diir-naxaad gacale
Daartii Culuumaha baddana, duudsiyaa dhacaye
Deelqaaf Marxuumkuna ma mudnan, iil-dugsanayaaye
ODHA daad u gala baa haddeer, loo duryamayaaye
Cidda Faysal liidkii duraba, diinnar ugu baaqi
Daabqadda Luul lagu sannifay, ee derbigu qoomay
Waa inay dirkii tahay Mataan, daynabshaa UCIDE
Daljirradu halkay qoon dhagreen, dooddu may garane
Eeggana kun daannaan Nadraay, daah-ka-rogayaaye
Waxa Qabille loo daamurshaan, dooddu garanayne
Wax bariido kaba looga diday, dooddu may garane
JAMHUURIGU dakanada u galay, dooddu may garane
“DAMAL waa fadhiid” geesi yidhi, dooddu may garane
NASIYEna astaan lagu dallacay, dooddu may garane
Daadduunka UDUB yaa jeclaa, dooddu may garane
Dabargooye dhitaduu jaqana, dooddu may garane
BADBAADANA wax daaddeys ku horay, dooddu may garane
NDB darraabada ay dhami, , dooddu may garane
“Danqaabeeya UDHIS waa bursayn”, dooddu may garane
Eeggana kun daannaan Nadraay, daah-ka-rogayaaye
Cashuuraha markaad doonayseen, deex-san baad tidhiye
Adaa deyday nagu raadshayoo, noo dus-yimi hiire
Diintiyo Samaalow kitaab, “daalacaan” idhiye
Bareyaasha sabab loo dayaco, dooddu may garane
Eeggana kun daannaan Nadraay, daah-ka-rogayaaye
Gabbooseba dharaar xaal degdega, raalli naga doonye
Dimuqraaddinnimadii ku aas, Jaalle kuu dilaye
Dibirradu Qaddaafay hoddoo, dala’sigii nuugye
Wax-ka-daye cagaa duulki Gedo, loo darxumo-waabye
Jihaadkiba agoontuu daldalay, daaciyaa qubaye
Mahatiir cidbaa dacal-dhigtiyo, Neelsankii dirice
Dabcigiisa waxa dhaadi jiray, daal ninkii badaye
Dirirtii shahiidkiyo wacdaro, lagama daaheene
Isagoo dayacay oo Tubeec, diifna ugu ciidmin
Muqdishiyo dunteedii xabaal, kulama doodeene
Daljir Muuse, diricyaal xusloo, Qaybe ugu dooryay
“Digashada ku aasaay guddida”, muu darbeen boqole
“Waa digreeto ereygiisu culus, meydna derejeyne
Noolaha ilbaa loo dabaa, dabin-ka-boodkiiye
Caataan u doorbiday qoraal, inu duxaystaaye
Adoon doonin maamuus Gaheyr, docashadaas keydi
“Iigama dartee keen” ku idhi, erey-daleeleede
“Axaddii darbaa geeyay meel, duudyadii Herere
Isniintiiba duri baa ku dhacay, waa duq aan kicine
Darka waad u helaysaa kanshee, kaadso doobyahaw’e
Xaglo-toosiyaa soo daf yidhi, xaynna daaddihine
Saakana anaan dool ku tegin, daba-dhiggaygiiye”
Dibnihiisa kama gaabiyeen, Xaajigaa dirane
Cirro iyo Aqoonyahan debbere, diidmadii Xarafe
Waxba yaanu goortaan “dug” dhaho, dogobka ii qiijin!
Dal-mideeyee, hooyada dihdee, Jeedna lagu duugay
Tacsi daaf geddii uu ku dhacay, diid dhambaal qudha’e
Ma deyrsheen inuu tago xabaal, danab Tallaabiiye
“Docdi Saqadhi naga awdi jiray, duufannaa imane”
Waa loo darsanayaa bilays”, duurxulkiyo oohin
Darayiyo jirrada saban dugsaday, lama daryeelayne
Dubay maalin lagu aasaybaaad, deeqo fidisaaye
Danab Shiine, Koosaarki Damal, dooxatada laysay
Danjiruhu fartuu taagay milay, daambas sama-doone
Shirqoollada digtaatoor ku kaco, dooddu may garane