Gareth Bale ayaa laga helay dhaawac ka soo gaaray muruqiisa bowdada, waxaana ay Real Madrid qiratay inaysan ilaa iyo haatan ogeyn mudada uu garoomada ka maqnaan doono. Bale ayaa la dhibtoonayay dhaawacan tan iyo markii uu tagay caasimada Spain, waxaana uu ka soo muuqday kaliya labo kulan oo horyaalka ah ilaa iyo haatan. Waxa uu seegayaa kulanka caawa ee Champions League ee ay kooxdiisa la leedahay FC Copenhaghen laakiin baaritaankii ugu danbeysay ee lagu sameeyay ayaa soo jeedinaya in muddo intaas ka dheer uu maqnaanayo. “Ka dib baaritaano la sameeyay maanta, waxaa Gareth Bale laga helay inay adkaadeen muruqa bowdadiisa bidix” ayaa lagu yiri warbixin la soo dhigay website-ka Real Madrid. Waxa ay u badan tahay inuu seego kulanka sabtida ee La Liga ee ay la leeyihiin Levante, waxaana laga yaabaa inuusan u ciyaarin Wales kulamada isreebreebka Koobka Adduunka ee ay la ciyaarayaan Macedonia iyo Belgium.
