HARGEYSA (GNA)-Madaxweynaha Somaliland Mudane Axmed Maxamed Maxamuud (Siilaanyo) ayaa maanta digreeto ku magacaabay degmo cusub oo uu ka dhigay degmadda Awr-boogays ee gobolka Sanaag.
Sidaasna waxa lagu sheegay war-saxaafadeed uu soo saaray Afhayeenka Madaxtooyadda Md. Axmed Saleebaan Duxul, waxaanu u dhignaa sidan:-
“Madaxweynaha Jamhuuriyada Somaliland Mudane, Axmed Maxamed
Maxamuud (Silaanyo) waxa uu xeer Madaxweyne oo sumadiisu tahay
JSL/M/XERM/249-2096/102013 uu degmo ugu magacaabay Awr-
boogays oo ka tirsan Gobolka Sanaag.
Madaxweynuhu:-
Markuu Arkay:Qodobka 109aad, Faqradiisa 3aad ee Dastuurka Jamhuuriyadda Somaliland.
Markuu Arkay:Qodobka 10aad ee Xeerka Gobollada iyo Degmooyinka oo tilmaamaya wax-ka-bedelidda Qaab-dhismeedka Dalka.
Markuu Tix-geliyey:Codsiyada ka yimid Madax-dhaqameedyada Waxgaradka, Culimada iyo Odayaasha Deegaanka.
Markuu Tix-geliyey:Baahida loo qabo in Degmada Awr-boogays loo magacaabo Degmo cusub.
Markuu Dhegeystay:Soo jeedinta Wasiirka Wasaaradda Arrimaha Gudaha;
Wuxuu go’aansaday
In uu Awr-boogays u magacaabo Degmo, taasi oo ka tirsanaan doonta Gobolka Sanaag.”