Wasiir Xaglo-toosiye oo maanta dhagax dhigay qayb cusub oo lagu kordhinayo Cisbitaalkan oo uu kormeeray adeegyadiisa..
Cisbitaalka TB-da ee Magaalada Buuhoodle, oo haatan shaqeeya ayaa waxa Wasiirka warbixin ka siiyay Xaaladiisa iyo adeegyada uu bixiyo Dr Axmed Faarax Nuur, oo ka mid ah Dhakhaatiirta Cisbitaalka ka hawl-gasha.
Dr. Axmed ayaa sheegay in Cisbitaalku bulshada deegaanka u fidiyo adeegyo daruuriya oo daaweyn iyo shaybaadh isugu jira, waxyaabo badan oo ka dhiman oo uu u baahanyahayna ay jiraan.
Wasiirka ayaa soo kormeeray dhamaanba qaybaha kala duwan ee Cisbitaalku ka koobanyahay, kuwaasoo isugu jira waadhadhka Bukaanka, Shaybaadhka, qaybta Daawooyinka iyo Xafiisyada.
Wasiirka ayaa kormeerkaasi ka dib, waxa uu dhagax dhigay qaybo cusub oo lagu kordhiyo Cisbitaalka, kuwaasoo ay Wasaaradda Caafimaadka Somaliland ku kordhinayso.
Wasiir Saleban Ciise Axmed ayaa mashaariic kale hore uga dhagax dhigay deegaamo hoos yimaada Magaaladan iyo kuwo gudaha Magaalada laga hir-gelinayo, kuwaasoo u badan xarumo Caafimaad oo baahi weyn loo qabay.
Dhaqaalaha ku baxaya Mashaariicdan ayaa waxa bixinaya Dawladda Somaliland, taasoo sanad Miisaaniyadeedka 2014 deegaamada Buuhoodle ugu dartay lacag gaadhaysa Nusmilyan Dollar oo lagu horumarinayo Kaabeyaasha adeegyada aasaasiga ah.
Najiib Cabdi wali
Gobanimonews
Buuhoodle Office
Email: editor@gobanimonews.com