Wasiirrada Somaliland oo dareeno kala duwan ka bixiyay maqalka Dilka Mukhtaar abu-subayr, Bulshada rayidka ah oo aragti xamaasadaysani ka muuqato iyo Taariik nololeedkiisii...
[caption id="attachment_91787" align="alignleft" width="300"]
Dadweynaha reer Hargeysa oo ciida isu diyaariyay[/caption]Hargeysa(GNA)-hadal haynta ugu weyn ee 24-kii saacadood ee la soo dhaafay Geeska Afrika bulshada dhaqan ka dhex guuxaysay ayaa ah arrinta ku saabsan sheegashada maraykanka ee dilka hogaamiyihii Ururka Alshabaab Axmed Cabdi Godane oo ahaa Muwaadin dhalasho ahaan ka soo jeeda Gobollada Somaliland.
Inta badan Wargeysyada ka soo baxa Magaalada Hargeysa ayaa iyagoo soo xiganaya dhawaaqa ka soo yeedhay waaxda Sirdoonka Maraykanka oo xaqiijiyay in Godane isniintii la soo dhaafay ku naf-waayay weerarkii Diyaaradaha Maraykanku ay fuliyeen.
Dadka ayaad moodaa inay maanta si weyn u xiisaynayeen warbixinaha ku saabsan dhacdadan xogta laga hayaa ay aadka u koobantahay.
Marka loo kuur-garo dareen-celinta mawduucan ee shacbiga “waanu soo dhaweynaynaa iyo ma soo dhaweynayno” ayaa laysku hayaa oo ay dadku ku sheekaysanayaan.
Dadka qaar ayaa ku dooddaya inuu ilaalin jiray danaha Somaliland “maalin kasta oo ay dawladda Xamar qaado talaabi Somaliland lid ku ah, weerarbuu fulin jiray” ayuu yidhi Nin ka mid ah dadka caadiga ah oo Wariyeyaasha Gobanimo kula hadlay suuqa dhexe “markaa inaga dhimashadiisu wax faa’ido ah inooma tarayso”ayuu sii yidhi isagoo gacanta ku haya Jaraa’id ka mida kuwa dhacdadan ka faalooday maanta oo uu iibsanayay.
Sida laga war qabo dhow jeer ayaa bulshada ku nool Gobollada Koonfureed ee Soomaaliya waxa ay ku cel-celiyeen in hogaamiyeyaasha Kooxda Al-shabaab ay ka soo jeedaan Gobollada Somaliland, isla markaana yihiin niman qul-qulato la soo doontay deegaamo dad kale leeyihiin.
Laakiinse mabda’ ahaan iyo Siyaasad ahaanba, Dawladda Somaliland waxay ka mid tahay wadamada geeska Afrika saxeexay Heshiiska la dagaalanka Argagixisada ee Reer Galbeedku hogaaminayo, waxaanay qayb ka tahay gulufka looga soo horjeedo koox kasta oo Jihaad doon ah oo dunida ka jirta, xataa khilaafada ISIS.
Sarkaal ka tirsan Laanta Sirdoonka Somaliland oo magaciisa qariyay, ayaa Gobanimonews u sheegay inay Dawlad ahaan iyo sirdoon ahaan, ay aaminsanyihiin in la dilay Axmed-godane, taasoo muujinaysa inay hayaan ugu yaraan xog lagu qanci karo.
“Maraykanku iskama sheego waxaanu xog dhab ah ka haynin” ayuu ku doodday Muwaadin u dhashay Somaliland oo Hargeysa ku sugan. Waxaase saaxiibkii oo la doodayay ku yidhi “ laakiinse sida uu hadalka u dhigay Ninka u hadlay Maraykanku ilaa hada ma hayaan wax cad oo lagu qanci karo oo muujinaysa in ninkaa la dilay”.
Xukuumadda
[caption id="attachment_91278" align="alignleft" width="300"]
Waran Cadde oo kenya u safaraya[/caption]Wasiirka Wasaaradda Arrimaha gudaha Somaliland, Cali Maxamed Waran-cadde oo maanta saxaafadda kula hadlayey Magaalada Hargeysa, si kor ka xaadis ah oo aan mawqif gaar ahaaneed ka turjumayn, uga hadlay dilka godane.
waxa uu yidhi “Sida uu caalamku u arko ayaanu u aragnaa (Dilka Hoggaamiyaha Al-shabaab)..”
Wasiirku waxa kale oo uu sheegay “Adduunka ayaana kala siman-nahay, qof kasta oo daalim ahna waanu soo dhoweynaa in la dilo”ayuu sii raaciyay Wasiirka arrimaha gudaha Somaliland.
Dhinaca kale, Wasiirka Warfaafinta iyo Wacyi-gelinta Somaliland Cabdilaahi Maxamed Daahir Cukuse oo Warbaahintu waydiisay sida ay dawladda uu madaxda ka yahay u aragto dilka hogaamiyihii Alshabaab, ayaa si cad uga qaabsaday inuu wax jawaab ah ka bixiyo mowduucan.
Cukuse oo maanta kulan la yeeshay Guddi-hoosaadka Ilaalinta Hantida Qaranka Baarlamanka ayaa mar wariyeyaashu ay waydiiyeen su’aal ku saabsan dilka Mukhtaar Abu subeer, yidhi“ annagu Alshabaab ma nihin, halkay joogaana ma nihin ee Dalka aanu jaarka nahay ee Soomaaliya ayay ka dhaqdhaqaaqaan”.
Godane iyo Somaliland
Sababta Masuuliyiinta Somaliland su’aalaha looga waydiinayo dilka Hogaamiyihii Jihaad doonka Alshabaab, waxa ay tahay laba arrimood.
Sababta koowaad waxa ay tahay arrinta aynu kor ku soo xusnay ee la-dagaalanka Argagixisada oo ay Somaliland, iyadoo aan la aqoonsanayn, hadana ka mid tahay dalalka kaalinta hore kaga jirta.
Sababta kale oo aan lafteeda hore u xusnay, waxa ay tahay, saameynta dhaqan dilka hogaamiyahani ku yeelanayo Qoyskiisa iyo qaraabadiisa oo badankoodu ku nool Magaalada Hargeysa, kuwaasoo waayay xubin ka mid ahayd oo hore uga falaagoobay, balse hadana sida xaqiiqdu tahay ay waalidkiisa iyo eheladiisa kaleba filayeen inuu mar uun isagoo bad qabo qoyska ku soo laaban doono.
Sidaasoo ay tahay Axmed Godane wuxuu ahaa nin mayal adag oo aan wax ixtiraama u haynin Somaliland iyo soomaalida kale ee mabdi’iisa ka soo horjeeda toona.
Si kastaba ha ahaatee rejadii qoyskiisu ka qabeen inuu Hargeysa iyo hoygiisa ku soo laaban doono Ninkan Dhalinyarnimada ku falaagoobay,noqdayna hogaamiye cabsi badan ku hayay dalalka Afrika iyo danaha reer Galbeedka ee Gobolka, ayaa u muuqata mid hada soo uruurtay.
Hase ahaatee waxa iska cad inuu wakhti kooban kor u sii kacayo wer-werkii dalalka ku hareeraysan Soomaaliya ay ka qabeen Weerraradii Kooxdiisu fulin jirtay ee Taatikada ku dhisnaa.[caption id="attachment_94581" align="alignleft" width="294"]
sawirka Godane waxa ku jira mugdi [/caption]
Urur-weynaha Al-qaacida iyo Alshabaab
Dawladda Maraykanka ayaa sannado ka hor liisk Argagixisada ku dartay Axmed Godane oo kooxdiisa looga yaqaano (Mukhtaar Abu Subeyr).
Taasi waxay ka dambeysay markii Kooxda Alshabaab ay si cad xidhiidh ula yeelatay Ururweynaha Al-qaacida ee oo Adduunka oo dhan shabakada ku yeeshay, isla markaana khatar ku ah danaha reer Galbeedka iyo dawladdaha saaxiibka la ah.
Taariikh Nololeedka Axmed-godane.[audio mp3="http://www.gobanimonews.com/wp-content/uploads/GODANE.mp3"][/audio]
Halkan ka dhegeyso:
Gobanimonews
Hargeysa Office
Email: editor@gobanimonews.com