Hargeysa(GNA)-Afar Wariye ayaa ku guulaystay tartan Saxaafaddeed Hay’addaha Qaramada Midoobay iyo Ururadda Saxaafadda Somaliland u qabteen Wariyeyaasha ka hawl-gala Hay’daha Warbaahinta Somaliland.
Tartankan oo ay wariyeyaashu kaga qayb-galeen warbixino ay ka qoreen Arrimaha Bulshada, Baadhista Saxaafadda, Haweenka iyo Siyaasadda iyo helida adeegyada, ayaa xubnaha ku guulaystay Abaal marino lagu guddoonsiiyay Xaflad balaadhan oo lagu qabtay Hudheelka Maansoor.
Xafladaasi, waxa ka soo qayb-galay Wasiirka Warfaafinta Somaliland Cabdilaahi Maxamed Daahir Cukuse, Wasiirka Shaqada arrimaha Bulshad , Masuuliyiinta Ururka SOLJA, Saraalka ugu sareeya Hay’adda UNDP Xafiiskeeda Somaliland, madax ka socotay Asxaabta Mucaaridka ah iyo Wariyeyaal.
Afarta Wariye ee Tartanka ku guulaystay,ayaa kala ah Tafaftiraha Gobanimo News Agency Saleban Cabdi Cali (Kalshaale), Barkhad Ladiif oo Wargeyska Saxafi ka shaqeeya, Khadar Xuseen oo ah ka mida wariyeyaasha Wargeyska Yool iyo Naasir Maxamed Cabdillaahi oo Waaheen u shaqeeya.
Wariyeyaasha ayaa ku kala guulaystay afarta Mawduuc ee Tartanku ku saabsanaa.
Masuuliyiinta ka qayb-gashay Xafladda ayaa hambalyo u diray wariyeyaasha guulaystay, kuwa kale ee tartanka ka qayb-galay balse aan guulaysana ku bogaadiyay dedaalka ay sameeyeen.
Tafaftiraha www.gobanimonews.com Saleeban Cabdi Cali (Kalshaale) oo Xaflada shalay hawlo-shaqo kaga maqnaa ayaa Maanta Abaal-marinta lagu Guddoonsiiyay Xafiiska Ururka Suxufiyiinta Somaliland ee SOLJA.
Xoghayaha Guud ee Ururka Suxufiyiinta Somaliland ee SOLJA Maxamed Rashiid Muxumed Faarax iyo Sarkaal sare oo ka tirsan Hay’adda UNDP, ayaa Suxufiga guddoonsiiyay Agab isugu Computer iyo qalabka wax lagu duubo,iyagoo ku hambalyeeyay dedaalka uu sameeyay.
Saleban Cabdi Cali oo halkaasi isna ka hadlay ayaa Masuuliyiinta Hay’addaha iska kaashaday hir-gelinta tartankan uga mahad-celiyay qorsheyaasha lagu horumarinayo Suxufiyiinta, waxaanu u soo jeediyay inay halkaasi ka sii wadaan, joogteyaana mashaariicda noocan ah.
Tartankan ayaa noqonaya kii ugu horeeyay ee noociisa ah ee dalka lagu qabto, iyadoo madaxda Hay’adaha iska kaashadayna balanqaadeen inuu noqon doono mid sanadle ah. 
Gobanimonews
Hargeysa Office
Email: editor@gobanimonews.com