Ceerigaabo(GNA)-Wariye Maxamed Yuusuf Bakayle ayaa lagu xidhay Magaalada Ceerigaabo, waxaana taxaabay Bilayska Magaalada.Xubin sare oo ka tirsan Xisbiga UCID, ayaa xadhiga suxufigan cambaareyey. “Anigoo Magacaygu yahay Hoodo Maxamuud Nuur Hoodo Garays isla markaana ka mid ah Xubnaha firfircoon ee Xisbiga Cadaalada iyo Daryeelka ee Ucid waxan halkan ka Canbaaraynayaa Xadhiga Wariye Maxamed Yuusuf Bakayle ee maanta oo bishu tahay 16/10/2014 lagu xidhay Magaalo Madaxda Gobolka Sanaag ee Ceerogaabo isagoo gudanaaya Hawlahoodii shaqo ee ay Qarankan u hayeen kaas oo aan leeyahay waa in sida ugu dhaqsaha badan Xoriyadooda loogu soo celiyo” ayaa lagu yidhi qoraal ay na soo gaadhsiisay Hoodo Maxamuud Nuur.
Suxufigan ayaa xoriyadiisa loo soo celiyay.
Xadhiga weriye Maxamed Yusuf Bakayle ayaa ka dambeeyey warbixin uu Xalay ka baahiyey Tvga madaxa banaan ee Royal, taasoo nuxurkeedu ahaa Aragtida dadweynaha reer Ceergaabo ay ka qabaan Golaha Deegaanka Degmada Ceergaabo, oo xiligan uu hadheeyey dib u dhac baahsan iyo khilaaf salka ku haya Lunsi dhaqaale, sida lagu sheegay baraha internetka.
Ma jiro wax war ah oo ka soo baxay maamulka Gobolka iyo kan degmada oo looga hadlay xadhiga suxufiga, balse waxa lagu eeddeeynayaa xubnaha dawladdu inay caadeysteen xadhiga wariyeyaasha.
Guddoomiyaha Gobolka Sanaag Maxamuud Cali Saleebaan Ramaax, ayaa lagu xasuustaa markii uu badhasaabka Saaxil ahaa xadhiga suxufiyiinta ka howl-gasha Magaalada Berbera oo uu si ula kac ah u xidhi jiray, kuwa dhaliila shaqada uu hayo.
“Dhamaanba ururka saxafiyiinta gobolka sanaag ayaa si isku mid ah u Canbaareeyey Xadhiga weriye Maxamed Bakayle, kuna tilmaamay mid aan sharci ahayn.”ayaa lagu yidhi Qoraal lagu baahiyay Qarannews oo xadhiga wariyaha looga soo horjeedo.
Gobanimonews
Ceerigaabo Office
Email: editor@gobanimonews.com