Dadka oo lugtooda isaga gooshaya Magaalada[/caption]Burco(GNA)-Wax-garadka, Aqoonyahanka iyo Siyaasiyiinta Gobolka Togdheer qaarkood ayaa Maanta bogaadiyey Socdaal ay toddobaadkan ku tageen Magaalada Burco Guddi ka socotay isbahaysiga Dhalinyarada Somaliland, kuwaasoo ay si balaadhan ugu soo dhaweeyeen Dhalinyarada Caasimada labaad ee Somaliland.
Wax-garadka, Aqoonyahanka iyo Siyaasiyiintan ayaa tallaabo ku dayo mudan ku tilmaamay in Dhalinyaro ka fayow Siyaasadaha guracan ee bulshada kala fogeynaya ay si niyad-sami ah iskaga kaashadaan toosinta iyo wax ka qabashada duruufaha kala duwan ee ku gedaaman Dalka iyo Dadka ku dhaqan Gobolada iyo Degmooyinka Somaliland.
Sidoo kale waxay hal-doorkani bogaadiyeen qaabkii ay Dhalinyarada Gobolada Togdheer Magaalada Burco ugu soo dhaweeyeen Wefdigii Dhalinyarada ahaa kasoo kicitimay Magaalada Hargeysa ee Xarunta Gobolka Maroodi-jeex, gaar ahaan Dhalinyarada ku midoobay Ururka Midnimo, taasoo ay ku tilmaameen tusaale wanaagsan oo qeyb ka noqon kara in jiilasha cusubi mideeyaan aqoontooda, kuna dabaqaan toosinta caqabadaha Maamul iyo kuwa dhaqan-dhaqaale ee dalka ka taagan.
Wax-garadka, Aqoonyahanka iyo Siyaasiyiinta Gobolka Togdheer kasoo saaray qoraal ay kaga hadlayaa arimaha kor ku xusan iyo kuwo kaleba, ayaa tirada Magacyadooda oo aad u badnayd awgeed, waxaanu ka cudur-daaranaynaa in kusoo koobnayd Magacyada xubnihii horeeyey oo u dhignaa sidan hoos ku xusan;
Jaamac Maxamed Ducaale
Maxamuud Axmed Ducaale
Maxamuud Axmed Samane
Cabdiqaadir Cabdillaahi Jaamac
Maxamed Cali Tiriite
Suldaan Xuseen Sahal
Maxamuud Raage Ibraahin
Cabdirisaaq Foos Maxamed Ducaale
Cabdi Sugule Faarax
Siciid Ibraahin Xuseen
Khadar Cabdi Xuseen.
Dhinaca kale Wefdiga Socdaalka ku tegay Xarunta Gobolka Togdheer, oo ay ka mid ahaayeen xubno hore u iclaamiyey Shir ay isugu yimaadaan Dhalinyarada Somaliland, ayaa maalmihii u danbeeyay ku sugnaa Magaalada Burco, waxana kulamo gooni-gooni ah la qaateen Dhalinyaradda reer Burco, iyadoo kulamo noocan oo kale ahi hore loogu qabtay qaar ka mid ah Gobolada iyo Degmooyinka Dalka.