Marka hore waxaan uga mahad-celinayaa Shacabka Somaliland adkaysiga iyo dul-qaadka ay u leeyihiin Masuulkasta oo markay xilka Qarankooda u doortaan inuu hoggaamiyaa, noqdo Hoggoomiye aad u malaynayso inuu hoggaaminayo ama Madaxweyne u yahay Golihiisa Xukuumadda.Xaqiiqadu siday tahay ka been-sheegi maayo oo Madaxweynihii hore Daahir Rayaale Kaahin siddeeddii sannadood ee uu Madaxweynaha ahaa afartii sano ee uu dambeeyey waxa gacanta ku dhigay dhawr Wasiir oo Golaha Wasiirrada Xukuumaddiisa ka tirsanaa, balse afartii sano ee hore wuxu ahaa Madaxweyne la socda dareenka iyo tabashada Shacabka uu Madaxweynaha u yaha. Waxa uu go’aan deg-deg ah ka qaadan jiray wixii cabasho adeeg Bulsho ah ee Golihiisa Xukuumadda laga sheegto ama dhalliili ka jirto.
Haddaba, markaan Mawduuca Qormadan iyo Madaxweyne Axmed Maxamed Maxamuud (Siilaanyo), u guda-galo, waxaan leeyahay Shacabka Somaliland waxay innoo tahay Sharaf in aynu hoggaamiyaha Shacabkeenna iyo Waddankeenna xilka ugu dhiibno codkeenna hadba kii ku guulaysta tartanka doorashada.
Balse, Shacabyahow waxaad ogaataan waxaynu ka soo gudubnay laba doorasho oo aynu ku doorannay laba Madaxweyne, waa Madaxweynihii hore ee Daahir Rayaale Kaahin iyo Madaxweyne Axmed Maxamed Maxamuud (Siilaanyo) oo wakhtigan dalka Madaxweyne ka ah, siddeed biloodna uga hadhsan tahay shantii sano ee Sharcigu u xalaaleeyey.
Sidaas awgeed, labadaas Madaxweyne midna Qolo ama Qabiil kumaynaan dooran ee waxaynu u doorannay six or ah, markaa waxaan leeyahay Shacabka Somaliland waynu wada arkaynaa in Madaxweyne Axmed-Siilaanyo oo ah Madaxweynihii u dambeeyey ee aynu doorannay isagoo Madaxweyne ah uu hoggaamin kari waayey Xisbul-xaakimkii KULMIYE ee aynu Codka ku siinnay.
Hase-yeeshee, Nuxurka Mawduucani waxa weeye Shacabkii siiyey Madaxweyne Axmed-Siilaanyo MAY DOORAN QABIIL EE WAXAY DOORTEEN MADAXWEYNE AXMED-SIILAANYO. Sidaa daraaddeed, waxaan leeyahay Beesha Madaxweynuhu ka soo jeedo hallaga daayo in lagu lammaaneeyo Xukuumadda oo Afarta Wasiir ee Madaxweynaha indhaha iyo dhegahaba kaga duubani waa laba Wasiir oo Beesha Bariga Burco ka soo jeeda iyo laba Wasiir oo Beesha Galbeedka Hargeysa ka soo jeeda’e, Afartaa Wasiir iyo Madaxweyne Siilaanyo-ba waynu iska qaban, oo Qarankan Somaliland waxa ilaashanaya Shacab dhiirran oo aan Qarannimo Mooyaane Qabiil-qabiil waxba loogu qabanayn.
Waxaan qormadan ku soo gebo-gabaynayaa ama ku soo gunaanadayaa oo aan leeyahay Shacabka Somaliland aynu ilaashanno Qarannimadeenna, nabadgelyadeenna, wada-jirkeenna midnimadeenna, maalinta doorasho la gaadhana Fartiinnu yay idiin xulin Madaxweyne Qabiil ee Codkiinna ku doorta Madaxweyne Qaran qof noqon kara oo aan Afar Wasiir iyo in ka badan midkoodna dhegaha iyo indhaha ka qabsan karin ee go’aan-qaadasho, la-tashi, dhegaysiga dhawaaqyada Shacaabka iyo hoggaamin buuxda leh. Wa Billaahi Tawfiiq.
Qalinka Mawliid Aadan Cumar
Tel: NO: 0634410898
mawliid1991@gmail.com
Hargeysa/Somaliland.