Hargeysa(GNA)-Wakiilka Midowga Yurub u qaabilsan Arrimaha Somaliya booqasho uu ku yimi Magaalada Hargeysa Salaasada Maanta, waxa uu ku sheegay inuu Xukuumadda Siilaanyo kala hadli doono dhowr arrimood oo ay ugu muhiimsantahay horumarinta iyo qiimeynta baahiyaha aasaasiga ah ee u baahan in wax laga qabto.Ambasador Michele Cervone d’Urso, oo Shir jaraa’id ku qabtay Magaalada Hargeysa, markii uu soo degay kaddib, ayaa sidoo kale sheegay inay dhawaan bilaabi doonaan qaybaha ugu horeeya ee mashaariicda ay ka fulinayaan Somaliland , kuwaasoo ku jira qorshaha cusub ee (New Deal compact), qaybta u gaarka ah Somaliland.
“haa waxyaabaha ugu muhiimsan ee aan halkan u imi waxa ka mid ah inaan ka wada hadalno dawladda sida loo hir gelin karo qaybta ku leedahay Somaliland Heshiiska wada shaqayneed ee cusub ee Somaaliya iyo Midowga yurub dhawaan wada galeen” . “ sidaan ognahay Somaliland waxa loo qorsheeyay qayb gaar ah (Especial Arrangement Of Somaliland).” Ayuu yidhi u qaybsanaha midowga Yurub ee Somalia.
Wakiilka oo wax laga waydiiyay sida ay Midowga Yurub u arkaan xiisadda soo noqnoqotay ee Gobollada Bari ee Somaliland, ayaa si aan gabasho lahayn u tilmaamay in khilaafka Gobolka Sool ee u dhexeeya Somaliland iyo Maamulka la baxay Khaatumo uu salka ku hayo arrimo siyaasaddeed, kaasoo loo baahanyahay inay wada hadal ku xaliyaan labada dhinac.
“ meelaha ay Xiisaddu ka jirto Gobollada bariga waxaan u aragnaa inuu yahay khilaaf siyaasaddeed, oo u baahan in wada hadal lagu xaliyo” ayuu yidhi Amb. Michele Cervone d’Urso, waxaanu intaas raaciyay “ hada iyo meel kasta oo aan kaga hadlayno arrintaa waxaan u aragnaa mid siyaasad salka ku haysa, waxaanan ugu baaqaynaa in si degenaanshiyo ah inta looga wada hadlo la dhameeyo” ayuu sii yidhi.
Somaliland ayaa inta badan meesha ka saarta inuu Khilaafka kala dhexeeya Khaatumo ismaandhaaf maxali ah ku salaysanyahay, waxaanay siyaasiyiinta khaatumo ku eeddeeyeen marar badan inay yihiin dagaal oogeyaal nabad-gelyada Gobolka carqaladaynaya oo ay dano shisheeye dabada ka riixayaan.
Waxaanay taasi caddeynaysaa in kala aragti duwanaanshiyaha Hargeysa iyo beesha caalamka ee ku saabsan arrinta xiisada gobolka sool ay tahay mid aan daah saarnayn, balse aan wali si rasmiya looga wada xaajoon.
Gobanimonews
Hargeysa Office
Email: editor@gobanimonews.com