Maansada Samir iyo Cali Dhanaaniye
Nafwaliba way dhadhaminaysaa geerida, waana xaq geeridu, inaga oo dhanbaana dil ku wada xukuman oo qof waliba waxa uu dhimanayaa saacadiisa, waxaan tixdan ugu baroordiiqayaa walaalkay Mujaahid C/risaaq Mohamed Ibraahin(C/Maarshaal) oo 1-1-2014 ku geeriyooday magaalada Burco ee xarunta gobolka togdheer waxaanan leeyahay walalo ilaahay hakuu naxariisto cawilkaagana hana siiyo waxaad hoyatay wakhtigaagii, walaalkay intaad ifka joogtay waxaad ku joogtay sharaf iyo karaamo, waxay geeridu ku haleeshay oo ay taadii gaadhay adigoo haya shaqo qaran oo dalkaaga iyo dadkaaga wanaagooda iyo nabadooda sugaya, waxaad u dhimatay qarankaad u dhaaratay ilaahay haku geeyo janno fardowsa isagaana awood badane hakaa waraabiyo webiyo malaba iyo webiyo caanno ah annagana hana siiyo samir buuxa iyo iimaan saadaqa iyo cawilkaagoo san.
Nafluhu safar weeye maanta
siroona allaa ya qaanaa
samaantuna waa gabaabsi
waxaynu sugnaaba geeri
sahayduna waa salaada
kashaydoon samir idhaahdo
saxeexa ilaahaybaa leh
sareeyaha ina abuuray
allaha siduu doono
allaha sakaraadka keena
sareediyo caafimaadka
Subxaanow mahad adaa leh
.......
allah siliciyo haraadka
saxariir holaciyo abaarta
allaha sagalkiyo daruurta
allah seermawaydo hoorsha
allaha dunidaba samaystay
ayaa mahadiyo sarayn leh
.........
samaaloow gacantaydii midigoow
walaal socotoo carowday
waxaa timi saacadaadii
cidina sii joogi mayso
qadarka rabi maan saluugin
......
socdaashay walaal samaale
sabadii loo wada hayaamay
so'dii iilkiyo xabaasha
walaal ciid dhabanka saartay
allaa sababteeda taaleh
salowna ma abuuri doonto
......
walaal saatirkeena weyni
su'aalaha kuu fudaydi
ku noolow sabo barwaaqo
dhul-doogloo saac iftiimay
xareed iyo udug ku saaqa
ku waar gacaloow sareedo
nasteexiyo guri samaanleh
ilaa saacada qiyaame
allow kuu sahal walaalo
annana samirkayaga xooji
....
siciid iyo hanad nadeeqa
saatirbaanu gacmaha utaagnay
inuu cawilkaa nasiiyo
waxaan ku afmeeray siinka
allow sakaraatul mowdka
markay sikinkeena gaadho
nawaafaji qowlka suuban...
aameen aameen....