Abwaan Cali Xaruuri ayaa MAANSO BAROOR-DIIQ ah ka tiriyay Geeridii Marxuum Abwaan Maxamed Xaashi Dhamac Gaariye oo sanadii koowaad lagu jiro.
Abwaanka ayaa kaga waramaya qiimihii iyo shakhsiyadii Marxuumka, waxaanu ku sawirayaa dareen ahaan siduu uga murugaysanyahay in qof noocaas oo kale ah Geeridu haleesho, inkasta oo ay xaq tahay oo aan qofna baajin karin ama tahay Dariiq Umadda loo jeexay oo la wada marayo .
Waxaanu Maansadiisa ku bilaabay sidan:-
Geeridu markii ay
garanwaa haleeshiyo
markay geesi qaadaa
dareen gaara weeyee
ma galbaday abwaankii
geesigii miyuu baxay
GAARRIYE ma jiitoo
ma god galay halyeygii
ina Xaashi miyu go´ay
gaadh buu ahaa adag
bulshadu ay ku gama´doo
gaashaan buu ahaa bira
geestiisa loo biqin
indheer-garad wuxu ahaa
garasho dheer lahaayow
ma gabbade wuxu ahaa
runta weligii gees marin
garyaqaan wuxu ahaa
dhibbanaha u gargaaree
Geeridu xaqweeyoo
NINBA GOOR AY NOQOTABA
Godka lama huraayee
goobtuu banneeyaan
mala goconayaayow
garasho dheeridiisii
mala goconayaayow
galilyaa jidhkeygii wada gaadhay maantee
Taariikhdu waa ma guurtee
diinwaan ayuu galay
Magaciisii muu go´in
murtidiisi ma ay gudhin
GAARRIYE ma uu dhiman
kamu guurin xiskeennii
gal dahab buu ku qoran yahay
aan soo gaabsho hadalkoo
gunaanado dhambaalkee
Gargaar kale ma hidin karo
duco ila gudboonoo
galabta aan awoodee
Guullow Allahayow
u waasici godkiisoo
kuwa gelaya Fardowsee
Geeshkii rasuulka ah
GAARRIYE ka yeelow
Galladdaada ugu deeq
Aamiin Aamiin Aamiin
Cali M. Aadam (Cali Xaruuri)